यें। राष्ट्रिय फोटो पत्रकार समूह नेपालं विपद्पाखें पीडित नागरिकया उद्धार व राहतया नितिं ग्वाहालि यायेत प्रधानमन्त्रीया विपद् राहत कोषय् ७७ हजार ७७७ तका ग्वाहालि याःगु दु ।
एनएफपीजे नेपालया केन्द्रीय नायः प्रदिपराज वन्तया नेतृत्वय् संस्थाया पदाधिकारी व दुजःपिन्सं संचार तथा सूचना प्रविधि मन्त्री डा.विक्रम तिमिल्सिना यात हस्तान्तरण यागु खः ।
संकटया इलय् प्रभावित नागरिकया लिक्क दनेगु सामाजिक जिम्मेवारीयात आत्मसात यासें एनएफपीजे नेपालया दुजःतय्सं थःगु हे व्यक्तिगत भत्ताया अंश योगदान यानाः रकम मुंकूगु खः । फोटोपत्रकारतय्सं याःगु थ्व पहलं—थःगु कमाइया छगू ब्व पीडिततय्त ग्वाहालि यायेत अलग तयेगु—मानवीय करुणा व सामाजिक जिम्मेवारीया उदाहरण खः ।
एनएफपीजे नेपालं नीस्वंगु इलंनिसें थीथी मानवीय व सामाजिक गतिविधिइ सक्रिय रुपं ब्वति कयाः फोटोपत्रकारया व्यावसायिक अधिकार व कल्याणया नापनापं सामाजिक दायित्वयात नं प्राथमिकता बियाः वयाच्वंगु दु । प्राकृतिक प्रकोप, दुर्घटना, व मेमेगु संकटया इलय् फोटोपत्रकारतय्सं घटनायात दस्तावेजीकरण यायेगु जक मखु, राहत व ग्वाहालि अभियानय् नं लगे जुया चोंगु दु।