नेसं ११४५ चिल्लाथ्व १२, येँ । नेवाः राजनीतिक महागुथि नीस्वंगु दु । वंगु शनिबाः नेवाः समाजय् राजनीतिक चेतनाया प्रवर्द्धन यायेगु ताःतुनाः दलगत आबद्धता मदुपिनि छगू मुँज्यां महागुथि नीस्वनेगु क्वछ्यूगु खः । उगु मुँज्यां माधव श्रेष्ठया संयोजकत्वय् गुम्हेसिया संयोजन समिति गठन याःगु दु । संयोजन समिती ज्ञानुरत्न महर्जन, किरण तुलाधर, राकेस मान मास्के, राजन सिं डंगोल, मनरा प्रजापति, त्रिलोक रत्न कंसाकार, योगेन्द्र राजकर्णिकार व प्रबिण महर्जन दुथ्याःगु दु ।

संयोजक श्रेष्ठं नेवाःतय् राजनीतिक चेतना थकायेगु व नेवा: राजनीतिया प्रवर्द्धन यायेगु आज्जु ज्वना थी थी ज्याझ्वः यायेगु न्ह्यथनादिल । मुँज्याय् ब्वति कासें अनुप सिं सुवालं थुगु महागुथि दलगत आवद्धतां मुक्त जुयाः विशुद्ध नेवाःतय्‌गु राजनीतिक मुद्दा ल्ह्वनाः नेवाःतय् दथुइ वनेमाःगु न्ह्यथनादिल ।

भेलां थीथी विभाग तकं नीस्वंगु दु । ज्ञानु रत्न महर्जनया संयोजकत्वय् प्रविण महर्जन व योगन्द्र राजकर्णिकार दुजः कथं दुथ्याःगु प्रशिक्षण विभाग निस्वंगु दुसा राजन सिं डंगोल व योगेन्द्र राजकर्णिकार दुथ्याःगु आर्थिक विभाग नीस्वंगु दु । अथेहे राकेस मान मास्केया संयोजकत्वय् ज्ञानु रत्न महर्जन व किरण तुलाधर दुजः कथं दुथ्याःगु संगठन विभाग नीस्वंगु दु । सञ्चार विभागय् धाःसा त्रिलोक रत्न कंसाकार, मनरा प्रजापति व प्रविण महर्जन दुथ्याःगु दु ।