थाैं मंगलबाः नं सार्वजनिक यातायात बन्द जुयाः लँजुयायात सास्ती जूगु दु । तर यातायात व्यवसायीपिन्सं धाःसा सार्वजनिक यातायात हडताल लित कायेगु सहमति याःगु दु । नेपाल यातायात व्यवसायी राष्ट्रिय महासंघया नायः विजयबहादुर स्वाँरं प्रधानमन्त्रीया ज्याकुथिं गुलि याकनं गण्डकी प्रदेश सरकारयात पौ च्वइ व गण्डकी प्रदेश सरकारं नियमावली निलम्बन याइ उलि हे याकनं थःपिंसं हडताल लित कायेगु धयादीगु दु ।

प्रधानमन्त्री ज्याकुथिं गण्डकी प्रदेश सरकारं हःगु ह्याउँगु नम्बर दुगु सवारी साधनं यात्रु तये दइगु राइडसेयरिङ नियमावली निलम्बन यायेत पत्राचार यायेगु तयारी यायेधुंकाः यातायात व्यवसायीतय्सं देय्न्यंकंया हडताल लित कायेगु सहमति याःगु खः ।

सोमवाः बहनी सरकारी वार्ता पुचः व सार्वजनिक यातायात व्यवसायीया प्रतिनिधि दथुइ जूगु स्वक्वःगु चरणया वार्ताय् थ्व सहमति जूगु खः ।

वार्ताया निंतिं गठन याःगु कार्यदलं सहमति जूगु विषयस भौतिक पूर्वाधार व यातायात मन्त्रालययात पौ च्वइगु, मन्त्रालयं प्रधानमन्त्री व मन्त्रिपरिषदया ज्याकुथिइ पौ च्वइगु, प्रधानमन्त्रीया ज्याकुथिं गण्डकी प्रदेश सरकारयात पाै च्वइगु व गण्डकी प्रदेशं नियमावली स्थगनयाय् धुंका हडताल लित कायेगु सहमति जूगु दु ।