नेपाःपाखें एकेडेमी अवार्ड (ओस्कार)या नितिं ‘तिनीहरूः एलिफेन्ट्स इन द फग’ संकिपा ल्यःगु दु । अविनाश विक्रम शाहं निर्देशन याःगु थूगु संकिपां सन् २०२७ य् घोषणा जुइगु नीन्याक्वःगु एकेडेमी अवार्डय् नेपाःया प्रतिनिधित्व याइगु जूगु दु ।

ओस्कारया अन्तर्राष्ट्रिय फीचर फिल्म विधाय् नेपाःया नामं धेंधेंबल्ला यायेत निगू फिल्मं आवेदन ब्यूगु खः । ल्यःज्या समितिया कथं ‘तिनीहरू एलिफेन्ट्स इन द फग’ व ‘गौथली’ दथुइ ल्यःज्या जूगु खः । निगुलिं संकिपाया मूल्यांकन लिपा प्राविधिक पक्ष, बाखं प्रस्तुति, पात्रया भावनात्मक पक्ष व कलात्मक शिल्पया आधारय् ‘तिनीहरूः एलिफेन्ट्स इन द फग’ संकिपा ल्यःगु समितिं न्ह्यथंगु खः ।

संकिपाय् पुष्प थिङ लामा, दीपिका यादव, जैस्मिन विश्वकर्मा, अलिज घिमिरे, अशान्त शर्मा, गौरी मल्ल, माओत्से गुरुङ लगायत कलाकारत दु ।

कान्स फिल्म फेस्टिभलया ‘अन सर्टेन रिगार्ड’ विधाय् ल्यःगु थ्व फिल्मं थ्व हे विधाय् निर्णायक मण्डलया सिरपाः नं त्याकूगु खः । थ्व संकिपा कान्सय् अवार्ड त्याकूगु न्हापांगु नेपाःया संकिपा खः । कान्सय् ऐतिहासिक उपलब्धि प्राप्त यायेधुंकाः थ्व संकिपा थौंकन्हय् नेपालय् क्यनेज्या जुयाच्वंगु दु ।

अन्तर्राष्ट्रिय फीचर संकिपा ल्यज्या समिति (नेपाल)या नायः लक्ष्मीनाथ शर्माया ल्हाःचिं दुगु प्रेस विज्ञप्तिपाखें थ्व जानकारी सार्वजनिक याःगु खः ।