नेवा: समुदायया हकहित सुरक्षित यायेत नेवा: राष्ट्रिय परिषद गठन जूगु दु। नेपाः मण्डलया न्ह्यलुवाः सुमन सायमीया संयोजकत्वय् शुक्रवाः येँय् जूगु छगू मुँज्याय् १५ म्हेसिया सचिवालय नीस्वंगु दु ।

सचिवालयया दुजःपिं रवीन्द्रकुमार श्रेष्ठ, विकासबाबु श्रेष्ठ, शिवभक्त रञ्जित, कृष्ण मानन्धर, जीवपति श्रेष्ठ, इन्द्रप्रसाद श्रेष्ठ, सिवेश बज्राचार्य, कुमार श्रेष्ठ, अनित रञ्जितकार, अनु साय्मी, रिना प्रधान, बेबी राजभण्डारी खः । संयोजक साय्मीं जारी याःगु विज्ञप्तिइ द्वलंद्वः दँनिसें पुर्खापिन्सं उत्पादन याःगु ज्ञानया लिधंसाय् समाजया व्यवस्थापन यायेगु खँ न्ह्यथनातःगु दु ।

साय्मीं नेवाः जातिया संस्कृति, सभ्यता, दर्शनया रक्षाया नितिं छगू परिषद् नीस्वनागु जानकारी बियादिल । उगु विज्ञप्तिइ नेवाः सभ्यता विश्वया पुलांगु सभ्यतामध्ये छगू जूगु न्ह्यथनातःगु दु । साय्मीं नेवातय्सं थःगु समृद्ध ज्ञान परम्परां चीन, मंगोलिया, कोरिया, जापान, तिब्बतयात तकं प्रभावित याःगु दाबी यानादिल ।