मिस नेपाल २०२३ श्रीछा प्रधानं नेपाःपाखें ७२ क्वःगु मिस वर्ल्ड ब्यूटी पेजेन्टय् ब्वति काइगु जूगु दु । पेजेन्ट भारतया तेलंगानाय् बैशाख २१ गतेनिसें जेष्ठ १७ गते तक जुइत्यंगु दु । थुकिया औपचारिक घोषणा मिस वर्ल्ड लिमिटेडया नायः व सीईओ जुलिया मोरली व तेलंगानाया पर्यटन, संस्कृति, सम्पदा व युवा मामिला विभागया सचिव स्मिता सभरवालं यानादीगु खः । मिस नेपाल आयोजक संस्था ‘द हिडन ट्रेजरं’ थुकिया औपचारिक पुष्टि याःगु दु । २८ न्हु तक जुइगु मिस वर्ल्डय् १२० म्ह सुन्दरीपिन्सं ब्वति काइगु जूगु दु ।

फाइनल जेठ १७ तारिखय् हैदराबादय् जुइगु जूगु दु । मिस वर्ल्डया आधिकारिक वेबसाइटय् तेलंगानाया थीथी थासय् थुगु कासा जुइगु खँ न्ह्यथनातःगु दु । उलेज्या व समापन समारोह हैदराबादय् जुइगु जूगु दु ।